Það gengur vel að uppfæra þessa síðu hjá mér skrifa reglulega á svona 2 mánaða fresti, haustið er búið að vera gott mikið selt og gengið vel með flest hrossin sem hafa verið í tamingu. Kafteinn frá Kommu kemur vel út eftir tveggja mánaða tamning mjög skemmtilegur hestur.

Nú eru kominn inn 25 hross ca þar af 12 stóðhestar þeir eru Akkur frá Brautarholti, Gígur frá Hólabaki,Bragi frá Kópavogi,Hróður frá Blönduósi,Glampi frá Stóra Sandfelli, Frontur frá Fremmra-Hálsi, Kafteinn frá Kommu svo einhverjir séu nefndir og svo eru væntanlegir Sólmundur frá Úlfsstöðum og Penni frá Glæsibæ en á þeim fola hef ég ógnartrú á enda stór og glæsilegur  tinnu svartur. 

Nú er búið að selja alla hlutina í Kapli frá Kommu, hluthafar í honum eru 28, við hittumst  á Blönduósi 27 des og held ég að flestum hafi litist vel á gripinn.

12. október 2008

Allt gott að frétta úr kreppunni bara verið að temja á fullu maður verður að vera með eitthvað klárt þegar Rússarnir koma að versla. Er með tvær öflugar "kellingar" með  mér núna þær Steffí og Hafdísi. En að öllu gamni slepptu þá gengur lífið sinn vana gang og það er gaman að skoða þessi tryppi að hausti og sjá hvað í þeim býr, við erum að temja nokkur hross sem ég á og líst mér ágætlega á hvernig til hefur tekist, 2 hryssur 4 gelding og 4 graðhesta. 

Ég var að setja inn myndir af folöldunum frá því í sumar fyrir þá sem hafa áhuga á því og vilja skoða þá klikkið á Myndir.

Ég var einnig að setja inn á sölu síðuna nokkur hross.

Þetta er Hildur frá Blönduósi undan Hlökk frá Hólum og Adam frá Ásmundastöðum hún er á 4 vetur bráð efnilegt tryppi.

Á næstu dögum mun ég setja inn upplýsingar um Kapal frá Kommu sem nú er komin í hlutfélag, en það eru nokkrir hlutir ósldir í honum af þeim hlutum sem verða seldir.

29.september 2008

Já sæll, nú er síðasta hryssan kominn heim með staðfest fyl. Það var haldið alltof mörgum hryssum þetta árið en það verður gaman þegar folöldin koma en þeir hestar sem ég notaði þetta árið voru.

Álfur frá Selfossi 2, Hugin frá Haga 2, Kerúlf frá Kollaleiru 2, Akkur frá Brautarholti 2, Tryggvi Geir frá Steinnesi 2, Grettir frá Grafarkoti 1,Kyljan frá Steinnesi 1,Hróður frá Refsstöðum 1, Sigur frá Hólabaki 1 og Hróður frá Blönduósi 1.

10. September 2008

Jæja nú er allt að gerast :) ný talva komin í gagnið svo vonandi verður hægt að fara að virkja þessa síðu eitthvað.

Nú eru frumtamningar hafnar, það eru nokkrir spennandi stóðhestar í þessum tryppahóp en sá sem mestar vonir eru bundnar við er án efa Kafteinn frá Kommu sem er sammæðra Kappa Heimsmeistara frá Kommu, og Blæ frá Torfunesi. Þetta er myndarlegur foli og mjög hreyfinga fallegur.

Svo ætla ég  að setja inn lista yfir tryppi sem eru til sölu, svo endilega kíkið á söluhross.

25.febrúar 2008

Nú eru fyrstu keppnir ársins búnar og hefur árangurinn verið svona upp og ofan fyrst var tölt í reiðhöllinni á Blönduósi og gekk það svona sæmilega, ég var í þriðja sæti á Óratoríu frá Syðri Sandhólum. En snilldin var að Helga Una sigraði á Sömbu frá Miðhópi sem er fimm vetra hryssa sem ég á ásamt Jóni Björnssyni á Akureyri, gaman af því. Svo var það meistaradeildin, þar var gert upp á bak og botninn skrapaður, en eigi skal bogna, maður gerir bara betur næst, (vonandi).

Samba frá Miðhópi og Helga Una.

Svo var komið að því að skreppa á Ístölt á Austurlandi, kerrunni var hent aftan í og haldið af stað og hirtir upp flækingar á leiðinni. Snoppa frá Kollaleiru og Dreyri frá Hóli fengu far austur með okkur Akk og virðist þessi ferð hafi lagst vel í þessi hross því þau fóru öll í úrslit í sínum greinum.

Akkur stóð sig með mikilli prýði og sigraði B. flokk gæðinga með 8,66 og er það gott svona snemma á keppnistímabilinu. Það er alveg magnað að heimsækja  þessa snillinga fyrir austan, takk fyrir mig.

9. febrúar 2008

Nú er allt að gerast, við nýttum okkur veðurblíðuna í vikunni og tókum nokkur hross uppá video og tók ég nokkrar myndir út úr því. Tamningar ganga ágætlega og eru við með 32 hross núna, 8 stóðhesta, 22 hryssur og 2 geldinga, en þeim mun fækka fljótlega. Í vikunni kom til okkar sænsk stúlka að nafni Madelen Björck, og verður hún í vinnu hjá okkur í vetur og kannski lengur. Svo fer að líða að fyrstu keppnunum og stefni ég á Ístölt á Austurlandi í B flokk með Akk frá Brautarholti. Svo er það blessuð Meistaradeildin, fyrst er það fjórgangur og stefni ég þangað með ungan og óreyndan hest en það kemur í ljós síðar.

Akkur frá Brautarholti:  
   

15. janúar 2008

Áramóta uppgjör ársins 2007

Mikið var aðhafst á síðasta ári og telst mér til að ég hafi tekið þátt í níu mótum og sýningum á tímabilinu febrúar til  aprílloka. Það var meðal annars ístölt á Austurlandi, ísmót á Svínavatni, Tekið til kostanna á Sauðárkróki og Meistarakeppni Húnvetninga.

Svo kom vorið þá byrjuð kynbótasýningar og gengu þær allflestar vel, sýnd voru 34 hross í fullnaðardóm og var meðaleinkunn þessara hrossa 7,94 sem er mjög viðunandi að MÉR finnst.

Hæstar á árinu  voru Nóta með 8,27 í ae þar af 8,50 fyrir hæfileika, Krafla 8,22 í ae þar af 8,34 fyrir hæfileika og Erla 8,16 í ae þar af 8,50 fyrir hæfileika.

Ég sýndi tvo stóðhesta báða 4. vetra; Sigur frá Hólabaki 8,01 í ae þar af  7,85 fyrir hæfileika og Ármann frá Hrafnsstöðum 7,97 í ae þar af 8,12 fyrir hæfileika. 

Ég tók einnig þátt í gæðingakeppnum og byrjaði ég á Hvammstanga hjá Þyt, sigraði B. flokk á Akk frá Brautarholti með 8,50 í forkeppni og 8,69 í úrslitum, var í öðru sæti í A flokk á Erlu frá Gauksmýri með 8,34 í forkeppni og 8,46 í úrslitum. Svo næst var það úrtaka fyrir Fjórðungsmót hjá Létti, var ég þar með Óratoríu frá Syðri Sandhólum í B. flokk og unnum við það með 8,69.

Á fjórðungsmótinu á Austurlandi enduðum við í 9. sæti og komumst því ekki í úrslit (sárt), en í tölti gekk betur og var ég þar með Erlu frá Gauksmýri og Óratoríu á meðal tíu efstu.

Í íþróttakeppni var einnig tekið þátt hjá Þyt og sigraði ég töltið á Óratoriu  með 7,12 í einkunn.

Á íslandsmótinu á Dalvík var ég í b úrslitum í tölti á Erlu frá Gauksmýri.

Samantekið í kílómetrum hef ég farið ca 143 km í kynbótasýningum á árinu miðað við 34 fulldæmd hross  á 300 metra langri braut og farið 14 ferðir með yfirlitssýningu

.

Sigur á Hólabaki á Fjórðungsmótinu á Austurlandi

Gleðileg jól og farsælt komandi ár

Þakka viðskiptin á árinu sem er að líða

Fátt markvert er að frétta þessa dagana annað en skítaveður og lítið hægt að ríða út.  En nú á næstu dögum kemur Akkur heim útskrifaður af tíu daga sund námsskeiði hjá Helga Leif og Örnu alveg flugsyndur kallinn og byrjaður að troða marvaða og allt,,,,,, ha ha .  Hann Garpur frá Hvoli slasaðist mjög illa á afturfæti fyrir ári og var ekki útlit fyrir að honum yrði nokkurn tíman riðið aftur. En eftir dýralæknismeðferð og síðan mánaðardvöl í sjúkraþjálfun hjá Helga og Örnu, undir eftirliti hjá Susy dýralækni, byrjaði kappinn að beita fætinum aftur og núna er búið að ríða honum í ca 2 mánuði og hann hlífir sér ekki enn, svo er bara að vona það besta, þannig að sund getur gert gott með.

Uppskeruhátíð Hrossaræktasamtaka A-Hún og Hestamannafélagsins Neista var haldin 1. des. Þar voru efstu kynbótahrossin í hverjum flokki verðlaunuð, ásamt því að knapi ársins var valinn hjá Neista, var það Ólafur Magnússon á Sveinsstöðum sem varð fyrir valinu og var hann vel að því komin. Hann vann öll innanhúsmótin í reiðhöllinni og  B. flokk hjá Neista, einnig var hann í úrslitum í Tölti á Íslandsmótinu á Dalvík- til hamingju Óli. 

Efstu hrossin voru .

 7v Hryssur Þruma frá Skagaströnd 8,27 ae                      7 v Stóðhestur   Ás frá Breiðabólstað 7,79 ae

6 v Hryssur Nóta frá Útnyðringsstöðum 8,27 ae                 6 v Stóðhestur   Skuggi frá Sturluhóli 

5 v Hryssur Griffla frá Geitarskarði  8,06 ae                      Enginn sýndur

4 v Hryssur Samba frá Miðhópi 7,55 ae                            4 v Stóðhestur  Kvistur frá Skagaströnd 8,17 ae

Hæðst dæmda hryssan var Þruma frá Skagaströnd  8,27.

Ræktunarbú ársins er Sunnukvistir,  Til hamingju með það.

Var að setja eina hryssu á sölusíðuna. Set inn fleiri söluhross fljótlega.

Allt gott að frétta af hestum og mönnum nú eru að koma ný hross á hverjum degi bæði stóðhestar og hryssur, Stóðhestarnir sem eru komnir eru  undan Sæ frá Bakkakoti, Galsa frá Sauðárkróki,Parker frá Sólheimum,Hervari frá Sauðárkróki, Þrist frá Feti og Sveini Hervari svo einhverjir séu nefndir..

Þessa dagana eru hross að koma inn sem stefnt er á að gera eitthvað með næsta sumar, svo sem kynbótadóma og hinar ýmsu keppnir.

Nú eru komin á hús; Akkur frá Brautarholti, Garpur frá Hvoli og nokkrir aðrir graðhestar. Hryssurnar fara að týnast inn næstu daga, svo sem Krafla frá Brekku, Óratoría frá Syðri-Sandhólum, Kyrja frá Sólheimum og margar fleiri hryssur sem ég bind miklar vonir við. Einnig koma til mín seinnipart vetrar nokkrar góðar hryssur sem ég sýndi síðastliðið sumar, enn meira af því síðar.

Eins og síðastliðin vetur þá erum við tvö í hesthúsinu, Helga Una og ég og vonandi fáum við einhvern okkur til aðstoðar eftir áramót. Ef þið vitið um lipran og áhugasaman starfsmann, þá endilega látið mig vita.

Hér fyrir neðan má sjá myndir af drengjunum mínum, fyrir utan þann nýjasta. Eins og sést þá stefni ég að því að eftir þrjú ár hafi ég hvern vinnumanninn á fætur öðrum.........því eins og allir vita getur verið erfitt að fá vinnumenn í dag :)

Kristófer Már

Kristófer Már og Aron Orri